Af hverju var þjóðin ekki upplýst fyrr um efni áætlunarinnar?
Grundvallaratriði áætlunar um efnahagslegan stöðugleika eru að mestu leyti framhald af þeirri efnahagsstefnu sem ríkisstjórnin hefur fylgt samanber áætlanir um halla á ríkissjóði á næsta ári til að mæta samdrætti og svo langtímaáætlanir um bata á ríkisrekstri og rammafjárlög til fjögurra ára. Fjármögnunarþörfin hefur legið fyrir í opinberri umræðu sem og þær upphæðir sem farið er fram á að láni frá IMF og öðrum þjóðum. Víðtæk sátt hefur verið um að byggja hér upp opið hagkerfi með fljótandi gengi gjaldmiðilsins. Stýrivextir voru hækkaðir í samræmi við mat seðlabanka, stjórnvalda og IMF á þörfinni fyrir samstilltar aðgerðir til að koma jafnvægi á gjaldeyrismarkaðinn. Peningamál Seðlabanka Íslands komu út og voru kynnt eftir að gengið var frá viljayfirlýsingunni í samstarfi við sérfræðinga IMF. Spáin sem þar er birt byggir því á sömu grunnforsendum og efnahagsáætlunin sem er grundvöllur samstarfs við Alþjóðagjaldeyrissjóðinn.
Enda þótt fátt í áætluninni sé líklegt að koma fólki á óvart er það er það regla IMF að birta áætlanir ekki opinberlega áður en yfirlýsing ríkisstjórnar og seðlabanka um aðgerðir er kynnt í framkvæmdastjórn og afgreidd ásamt fylgigögnum á borð við skýrslu sendinefndar (Staff Report). Þar sem áætlunin og lánsumsókn Íslands til IMF var komin á dagskrá stjórnar fékk ríkisstjórn leyfi til að birta sjálfa viljayfirlýsinguna enda er hún lögð fram á Alþingi sem þingsályktunartillaga. Öll önnur gögn málsins verða gerð opinber um leið og það hefur verið afgreitt í stjórn IMF.