Fjallað um aukna möguleika á samvinnu milli Íslands og Kanada
Sigmundur Davíð Gunnlaugsson forsætisráðherra ávarpaði í gær Efnahags- og þróunarráð Edmonton í Kanada. Í ræðu sinni fjallaði ráðherra um umhverfi fjárfestinga og viðskipta á Íslandi og aukna möguleika á samvinnu milli Íslands og Kanada í kjölfar bættra flugsamgangna. Nefndi forsætisráðherra meðal annars aukin tækifæri í viðskiptum og fjárfestingum, ferðamennsku, samvinnu á sviði auðlindanýtingar og í málefnum norðurslóða, sem og í menntamálum.
Þá átti forsætisráðherra fund með Don Iveson, borgarstjóra Edmonton. Borgar- og skipulagsmál voru meðal þess sem rætt var á fundinum en einnig var rætt um aukna möguleika hvað ferðamennsku og viðskipti varðar í kjölfar flugs Icelandair beint til Edmonton. Í borginni er mikill áhugi á auknum samskiptum við Ísland og lýsti borgarstjórinn 6. mars sem „Íslandsdag“ og afhenti forsætisráðherra skjal því til viðurkenningar.
Forsætisráðherra tók þátt í fyrirspurnartíma í Albertaþingi og heimsótti Listasafnið í Alberta. Þá var ráðherra viðstaddur leik Edmonton Oilers og New York Islanders í NHL deildinni í íshokkí í gærkveldi.
Í dag mun forsætisráðherra ávarpa Viðskiptaráð Edmonton og kynna sér ferðamálaiðnaðinn og olíuiðnaðinn í Albertafylki. Ráðherra mun eiga fund með menningarmálaráðherra Albertafylkis og halda móttöku til heiðurs Vestur-Íslendingum en fjölmargir Kanadamenn af íslenskum uppruna búa í Edmonton og Albertafylki.
Kanadískir fjölmiðlar hafa tekið fjölda viðtala við forsætisráðherra á meðan á dvöl hans hefur staðið í Edmonton. Vinnuheimsókn ráðherra lýkur á morgun.