Leiðréttingin

10. nóvember 2014

Forsætisráðherra og fjármála- og efnahagsráðherra, ásamt verkefnisstjórn um höfuðstólsleiðréttingu, kynntu í dag niðurstöður skuldaleiðréttingarinnar á fundi í Hörpu.

Aðgerðin vegur þyngst fyrir fólk undir meðaltekjum, sem var innan við fertugt við hrun, á lítið eigið fé í húsnæði sínu og skuldar á bilinu 15 til 30 milljónir króna.

Greiðslubyrgði lántaka lækkar strax sem nemdur leiðréttingunni og ríkissjóður hefur milligöngu um lokauppgjör leiðréttingarláns í ársbyrjun 2016

Verður lánum skipt upp í tvo hluta, frum- og leiðréttingarlán, og mun skuldari einungis greiða af frumláni frá og með uppskiptingu lánsins.

Leiðréttingin lækkar höfuðstól íbúðalána um 150 milljarða króna á næstu 3 árum og við fullnýtingu leiðréttingar lækkar höfuðstóll íbúðalána um allt að 20%. 

Með beinu  og óbeinu framlagi ríkisins er öll verðbólga umfram 4% á árunum 2008-2009 leiðrétt til fulls. Eiginfjárstaða 56.000 heimila styrkist með beinum hætti og um 2500 heimili færast úr því að eiga ekkert eigið fé í fasteign sinni yfir í jákvæða eiginfjárstöðu.

Fjármögnunartími aðgerðanna verður styttur úr þremur árum í eitt. Það tryggir betri nýtingu fjármuna  sem ella hefðu farið í vaxtagreiðslur til fjármálastofnana og gerir stjórnvöldum kleift að greiða hærri fjárhæðir inn á höfuðstól lána. Verða 40 milljarðar greiddir inn á leiðréttingarlánin á þessu ári, 20 milljarðar í upphafi næsta árs og 20 milljarðar í byrjun árs 2016.

Leiðréttingin styrkir þannig forsendur frekari hagvaxtar og og léttir skuldabyrði heimilanna. Öflugur hagvöxtur og lítil verðbólga getur stutt frekar við eiginfjárstöðu íslenskra heimila á næstu misserum. 

Inngreiðslur séreignarsparnaðar á höfuðstól hefjast um næstu mánaðamót og höfuðstólslækkun með leiðréttingarleið eftir staðfestingu skuldara í desember. Hver og einn getur kynnt sér niðurstöðu höfuðstólslækkunar lána sinna á leidretting.is frá og með 11. nóvember. 


Eldra efni


18. maí 2014

Opnað var fyrir umsóknir um leiðréttingu á höfuðstólslækkun verðtryggðra lána. Umsóknarfrestur var til og með 1. september 2014. 

26. mars 2014 

Ríkisstjórnin kynnti tvö lagafrumvörp sem lækka húsnæðisskuldir heimila í landinu og auðvelda þeim sem ekki eiga íbúð að kaupa húsnæði. 

30. nóvember 2013

Aðgerðir ríkisstjórnarinnar varðandi leiðréttingu verðtryggðra húsnæðislána voru kynntar á blaðamannafundi sem forsætisráðherra og fjármála- og efnahagsráðherra boðuðu til. 

Senda grein