Umleikið vindum veraldar - Formáli

Sumarið 1999 fólu norrænu samstarfsráðherrarnir starfshópi undir nafninu nefnd vísra manna að íhuga framtíðarstefnu og verkefni í norrænu samstarfi. Starfshópurinn hélt stofnfund sinn 3. september 1999 og hóf þá starf með því að kanna sameiginlega þætti í þjóðfélagsþróun á Norðurlöndum og meta kröfur og markmið í norrænni samvinnu í ljósi þessarar þróunar.

Skýrsla hópsins hefur verið send til ráðherranna sem fólu honum verkefnið. Samstarfsráðherrarnir fóru fram á að skýrslan yrði aðgengileg almenningi. Hún hefur því verið gefin út í bókarformi undir nafninu: Norrænt samstarf 2000 - Umleikið vindum veraldar. Jafnframt hefur skýrslan verið gerð aðgengileg á Netinu á vefsíðunni http://www.norden.org/vis

Í starfshópnum sem vann að gerð þessarar skýrslu voru Jón Sigurðsson bankastjóri, Íslandi (formaður), Lykke Friis stjórnmálafræðingur, Danmörku, Ole Norrback sendiherra, Finnlandi, Jóannes Dalsgaard deildarstjóri, Færeyjum, Marianne Jensen fyrrverandi landsstjórnarmaður, Grænlandi, Tove Bull háskólarektor, Noregi, Britta Lejon ráðherra, Svíþjóð, og Anders Ingves skipulagsfræðingur, Álandseyjum.

Þátttakendur í starfshópnum voru valdir sem einstaklingar en ekki sem fulltrúar samtaka eða ríkisstjórna.

Nefndin kallaði saman ráðgefandi hóp sérfræðinga til að kanna atriði er varða skörun og tengsl ýmiss konar alþjóðlegra samtaka sem snerta Norðurlönd og norðlæg svæði almennt og einkum þó atriði sem snúa að lífríki Norður-Atlantshafs. Sérfræðingarnir voru Holger Rotkirch sendiherra, Olav F. Knudsen prófessor, Davíð Egilsson deildarstjóri og Soffía Guðmundsdóttir framkvæmdastjóri.

Ritstjóri skýrslu starfshópsins var Larserik Häggman framkvæmdastjóri. Svenolof Karlsson aðstoðaði við útgáfu skýrslunnar. Ritari starfshópsins var Niels Refslund.

Kaupmannahöfn í október 2000
Jón Sigurðsson