Öllum er heimilt að nota þjóðfánann, enda sé farið að lögum og reglum sem um hann gilda. Fánann má nota við  hátíðleg tækifæri, jafnt þau sem tengjast einkalífi sem önnur eða á sorgarstundum, þá dreginn í hálfa stöng.

Ríkisfánann (tjúgufánann) nota Alþingi, ríkisstjórn, Hæstiréttur, ráðuneyti, aðrar stofnanir ríkisins og fulltrúar utanríkisþjónustunnar erlendis, þ.e. sendiráð, ræðisstofur og aðrar sendistofnanir.

Um borðfána, bílfána og aðra smáfána fer, að því er varðar liti og stærðarhlutföll reita og krossa, samkvæmt almennum reglum um þjóðfánann, ákvæðum fánalaga og auglýsingu um fánaliti.

Með burðarfána er átt við þjóðfánann á burðarstöng. Í hópgöngum er stærð slíks fána venjulega annaðhvort 150×208 sentímetrar eða 120×167 sm, en lengd stangar þrisvar sinnum breidd fánans.

Í fánalögum segir að enginn megi óvirða þjóðfánann, hvorki í orði né verki, og að brot gegn þessu ákvæði varði sektum, varðhaldi eða fangelsi.