Lögum um eftirlaun ráðherra, þingmanna og æðstu embættismanna verður breytt
Til þess að fylgja eftir stefnuyfirlýsingu ríkisstjórarinnar hafa ríkisstjórnarflokkarnir komist að samkomulagi um að leggja til breytingar á l. nr. 141/2003 um eftirlaun. Markmið breytinganna er að draga úr misræmi milli lífeyrisréttinda þeirra sem falla undir lögin og almennra launþega :
Í fyrsta lagi verði aldurslágmark til töku eftirlauna hækkað úr 55 árum í 60 ár fyrir ráðherra, þingmenn og hæstaréttardómara.
Í öðru lagi er lagt til að réttindaávinnsla hjá alþingismönnum verði eftirleiðis 2,375% fyrir hvert ár í embætti og samsvarandi fyrir hluta úr ári, í stað 3% ávinnslu samkvæmt núgildandi lögum. Hjá ráðherrum og hæstaréttardómurum verði ávinnslan lækkuð úr 6% í 4%.
Í þriðja lagi er lagt til að girt verði fyrir það að þessir hópar njóti samtímis eftirlauna og launa frá ríkinu.
Í fjórða lagi er lagt til að sérákvæði um eftirlaunakjör forsætisráðherra verði felld á brott þannig að um fyrrverandi forsætisráðherra gildi eftirleiðis sömu reglur og um aðra ráðherra.
Áunnin réttindi ráðherra og þingmanna samkvæmt núgildandi lögum skerðast ekki en frá og með gildistöku breytinga, 1. júlí 2009, ávinna þessir sér rétt samkvæmt nýju lögunum. Þegar kemur að töku eftirlauna verða þau ákveðin í samræmi við árafjölda í hvoru kerfi. Núverandi hæstaréttardómarar njóti hins vegar óskertra réttinda samkvæmt núgildandi lögum út skipunartíma sinn.
Gert er ráð fyrir að frumvarpið verði lagt fyrir Alþingi í næstu viku.
Reykjavík 21. nóvember 2008