Heillaóskir til nýs formanns landsstjórnar Grænlands
Forsætisráðherra sendi í dag heillaóskir til nýs formanns landsstjórnar Grænlands, Alequ Hammond, en tilkynnt var í gær um nýja ríkisstjórn sem hún leiðir á Grænlandi. Forsætisráðherra lagði í bréfi sínu áherslu á langvarandi vináttu og samskipti Íslands og Grænlands í gegnum tíðina og kvaðst fagna því sérstaklega að nú hefði kona tekið við leiðtogahlutverki á Grænlandi í fyrsta sinn.
Ísland ráðgerir að opna aðalræðisskrifstofu á Grænlandi síðar á árinu og taldi forsætisráðherra það geta stuðlað enn frekar að því að dýpka þá vináttu og þau tengsl sem fyrir eru, á menningarsviði, í viðskiptum og samstarfi af ýmsu tagi.