Ríkisstjórnin samþykkir styrkveitingu vegna 350 ára afmælis Árna Magnússonar 2013

Ríkisstjórn Íslands hefur samþykkt styrkveitingu að upphæð tólf milljónir króna til Stofnunar Árna Magnússonar í íslenskum fræðum. Styrkurinn er veittur vegna hátíðahalda og ýmissa verkefna í tilefni af því að 350 ár eru liðin frá fæðingu Árna Magnússonar í nóvember á þessu ári. 

Arfleifð Árna Magnússonar varðar tungu, bókmenntir og menningu þjóðarinnar, en Árni helgaði ævi sína fræðistörfum og söfnun handrita. Handritin teljast til auðlinda þjóðarinnar og hafa verið tilnefnd á lista UNESCO yfir Minni heimsins. Manntalið árið 1703, sem unnið var að frumkvæði Árna Magnússonar og Páls Vídalín, hefur verið tilefnt á sama varðveislulista. 

Í tilefni af afmælisárinu hefur verið efnt til sex sýninga víðsvegar um landið. Alþjóðleg ráðstefna verður haldin í Reykjavík dagana 10. - 12. október nk. Þar að auki verða fræðsluverkefni sett á laggirnar og bækur og handritakort gefin út í samstarfi við íslensk forlög. Afmælinu verður fagnað sérstaklega þann 13. nóvember 2013 með opnun sýningar, afmælisfyrirlestri og hátíðardagskrá í Þjóðleikhúsinu. Þar sem drjúgur hluti safns Árna er enn í Danmörku munu koma þaðan góðir gestir og náið samstarf haft við Dani. Viðburðum á afmælisárinu er ætlað að ná til alls almennings en ekki síst til ungs fólks og skulu þeir minna á sameign þjóðarinnar á handritunum.