Ríkisstjórnin styður tillögu um að Akureyri hýsi skrifstofu Alþjóðlegu norðurskautsvísindanefndarinnar
Markmið Alþjóðlegu norðurskautsvísindanefndarinnar - IASC (International Arctic Science Committee) er að stuðla að samstarfi um rannsóknir á norðurslóðum og að veita ráðgjöf til stjórnvalda um málefni þeirra. Stofnunin leiðir saman opinberar rannsóknarstofnanir og -samtök frá 23 löndum og hefur skipað sér sess sem einn mikilvægasti alþjóðlegi samstarfsvettvangurinn um rannsóknir og vöktun á norðurslóðum.
,,Þetta er gríðarlega áhugavert verkefni og margvíslegur ávininngur að fá skrifstofuna hingað til lands. Með henni fengi íslenskt vísindasamfélag aðgang að öflugu tengslaneti vísindamanna á norðurslóðum og líklegt er að áhugi erlendra vísindamanna á rannsóknarsamstarfi við Íslandi myndi eflast. Þá skiptir ekki síður máli að skrifstofan gæti eflt enn frekar þá merkilegu norðurslóðastarfsemi sem fyrir er á Akureyri,“ sagði Sigmundur Davíð Gunnlaugsson forsætisráðherra.
Á Akureyri eru þegar til staðar nokkrar stofnanir um málefni norðurslóða. Má þar nefna Stofnun Vilhjálms Stefánssonar, skrifstofur Norðurskautsráðsins: PAME (Protection of the Arctic Marine Environment) og CAFF (Conservation of Arctic Fauna and Flora), og Norðurslóðanet Íslands. Á Akureyri starfar einnig sérhæft fyrirtæki, Arctic Portal, við söfnun, úrvinnslu og miðlun upplýsinga um norðurslóðir. Á Akureyri er því öflugt norðurslóðasamfélag undir einu þaki sem gæti skapað ýmiss konar samvirkni við IASC skrifstofuna.
Frá upphafi hefur Rannís átt aðild að IASC fyrir hönd Íslands. IASC hefur áheyrnaraðild að Norðurskautsráðinu og gegnir mikilvægu hlutverki við miðlun upplýsinga frá vísindasamfélaginu til ráðsins um niðurstöður rannsókna á náttúru- og samfélagsbreytingum á norðurslóðum.
Skrifstofa IASC hefur frá árinu 2009 verið staðsett í Potsdam í Þýskalandi en áður hefur skrifstofa IASC verið staðsett í Svíþjóð og Noregi. Skrifstofan er ábyrg fyrir daglegri starfsemi IASC. Ef að yrði myndi Ísland taka við rekstrinum í byrjun árs 2017.
Ákvörðun um staðsetningu IASC skrifstofunnar verður tekin á ársfundi IASC í Fairbanks, Alaska sem haldinn er þar um miðjan mars.