Ráðherraskipti

Frá ríkisráðsritara

Á fundi ríkisráðs á Bessastöðum í dag veitti forseti Íslands Ingibjörgu Pálmadóttur lausn frá embætti heilbrigðis- og tryggingamálaráðherra og skipaði Jón Kristjánsson alþingismann til að vera ráðherra í ríkisstjórn Íslands.

Þá staðfesti forseti Íslands svohljóðandi úrskurð um breytingu á úrskurði um skiptingu starfa ráðherra:

Samkvæmt tillögu forsætisráðherra er hér með gerð sú breyting á forsetaúrskurði nr. 72 frá 28. maí 1999, um skiptingu starfa ráðherra, að Jón Kristjánsson fer með ráðherrastörf þau sem Ingibjörgu Pálmadóttur voru falin í nefndum forsetaúrskurði og fer hann með heilbrigðis- og tryggingamálaráðuneytið.